Igandean Anaita B ligako laugarren sailkatua bisitatzea egokitu zitzaigun. Eta partida arraroa izan zen, gorabeheratsua, non eraso zuri-berdeak erraz gainditzen zuen Donibaneren defentsa. Gureek ez zuten jokatu ligako bigarren itzuli honetan ohi duten intentsitatearekin.
Esandako guztiarekin partida nahiko berdinduta hasi zen (3 – 2 min 5) eta Anaitak aldea estutu eta handitu bazuen ere, gure neskek bi minututan 3-0eko partziala lortu zuten, berdinketa lortuz (7 – 7 min 12). Baina laster ikusi zen ez zela berdeen eguna, aurkariaren erasoaren azkartasunak gainditu baitzituen. Erraz joan zen zabaltzen aldea markagailuan (12-8 min 21), eta Donibane berriro gerturatzen saiatzen zen arren, lehen zati honen azken tartea Anaitaren bakarrizketa hutsa izan zen, 18 -13 iritsiz atsedenaldira.
Geldialdiak ez zien asko balio izan berdeei. Ulertezina bada ere, hutsegiteak zuzentzeko hutsartea eskatu arren, ia hamar minutuz egon ziren golik sartu gabe. Horrek bi taldeen arteko arrakalarik handiena ireki zuen (23 – 13 min 10). Hortik aurrera defentsak hobera egin zuen eta erreakzio txiki bat izan zuten. Horren ondorioz bigarren zati honetako gol kopurua 12-9koa izan zen, gure taldearen azken partiduetako emaitzekin antzekoagoa lehen zatian sartutako hemezortzi gol horiek baino. Azken 30 – 22 hori ez da emaitza txarra sailkapenari erreparatzen badiogu, baina Donibanek gehiago eman ahal izan zuelako sentsazio gazi-gozoarekin gelditu ginen.
HAURREK GARAIPEN GARRANTZITSUA LORTU DUTE ALDEZARREN AURKA 26 – 21
Partida oso ona izan zen joan den astelehenean Donibanen jokatu zena. Ona bereziki lehen zatian, non aurkaria baino askoz gehiago izan ziren gureak, arlo guztietan. Hasieratik Donibanek partidaren agintea hartu zuen eta oso azkar lortu zituen errenta zabalak, oso eraso arinean, talde konbinazio politekin eta banakako ekintza onekin, Aldezar taldeko jokalari onenei euren jokoa garatzea eragozten zien defentsa moldean oinarrituta. Atsedenaldian, nagusitasun hori markagailuko 19-12ko emaitzan islatu zen.
Bigarren zatian bisitariek defentsa-maila igo zuten nabarmen eta gureei askoz gehiago kostatu zitzaien atea aurkitzea. 7 gol besterik ez zuten sartu partzial honetan eta aurkarien erdiko hormaren kontra jo zuten behin eta berriz. Hala ere, Donibanek lehen zatiko defentsa mailari eusteaz gain, hobetu egin zuen. Horri esker partida ez zen inoiz arriskuan egoneta aldi horretan bisitariak 9 goletan utzi zituen. Horrela, amaierako markagailuak 26-21 bat erakutsi zuen, zelaian ikusitakoarekin bat eginez.
Taldearen hobekuntza agerikoa da eta nabarmena izan zen, adibidez, partidu honetan. Denboraldiaurrean Aldezar arerio izan zuten lagunartekoan Donibanek 5 puntuko aldearekin galdu zuen. Duela pare bat hilabeteko ligako partidan 1etik irabaztea lortu zuten berdeek eta atzo markagailuak 5 puntuko aldea erakutsi zuen gureen alde. Horrek gure haurren bilakaera oso ona dela argi uzten du. Segi horrela!
