Loyola A-ren txanda izan zen joan den igandean ADSJ-DKEko zelaia bisitatzeko eta gure gazteen aurka jokatutako partida ikusgarria izan zen benetan.
San Ignaziorenak iritsi ziren mailako bigarren golegileren tituluarekin eta beren defentsa estilo ireki, oso presiogile, deseroso eta itogarriarekin. Ezta pentsatzeko denborarik ere ez zieten ematen gureei kantxaren erdian. Donibanek aurreko egunetako intentsitaterik gabe hasi zuen partida, alde batetik Loiolako mugimendu azkarrek defentsa erraz gainditzen zutelako eta, bestetik, gureek erasora jo behar zuten hainbatetan akatsak egin zituztelako. Laster gorriak lau puntu gorago jarri ziren eta partida gelditu behar izan zen gure nesken akatsak zuzentzen saiatzeko. Hortik aurrera, abantaila handiagoa izatea saihestu zen. Aurkariaren defentsa irekiko hutsuneak aprobetxatu zituzten lehen lerro on bati esker. Lehen zati honetan guztian Donibane eroso ez ibili arren, 10 – 15eko emaitzarekin iritsi ziren atsedenaldira. Ondoren, defentsa apur bat gehiago egokituta, partidan sartu ziren berriro gogoz bigarren zatian.
Berdeek defentsan hobetu zuten eta bigarren zati super parekatu bat ikusi genuen, bi taldeen jokaldi onekin. Eta markagailuan aurretik jartzeko benetako aukerak izan zituzten berdeek. Birritan jarri zen Donibane hiru goletara, azken aldia partida amaitzeko hamar minutu falta zirela. Amaieran, ordea, Loyolak erakutsi zuen zergatik dagoen sailkapeneko goiko postuetan eta bere erasoei abiadura izugarria emanez, abantaila handitu zuen, 23 – 29 emaitza lortuz. Donibaneko nesken aurrerapen handia azpimarratzen jarraitzen dugu, lehen itzulian lortutako emaitzak argiki hobetuz.
HAURREN DEFENTSA HANDIA MALKAITZ B-REN AURKAKO PARTIDAN
Larunbatean ADSJ-DKEko kiroldegian jokatu zen Donibane eta Burlatako Malkaitz B-ren aurkako partidua.
Berdeek defentsa sendoarekin eman zioten hasiera, laguntza etengabearekin, bi taldeen altuera eta fisikoaren arteko aldearen ondorioak murriztuz. Erasoan pixka bat gehiago kostatzen zen, baina pazientziaz berdinduz zihoazen sartutako golak. Baina lehen zatiko azken minutuetan Malkaitzek bi gol jarraian egin zituen, atsedenaldirako haien aldeko 9 – 12ko emaitza lortuz. Bigarren zatiaren hasiera erabakigarria izan zen. Burlatakoek defentsa gehiago itxi zuten eta atezainaren lan bikainak gure nesken jaurtiketa asko ur errean utzi zituen. Lehen hamar minutuetan 1 – 6 partzialak erabakita utzi zuen partida, Donibanek inoiz amore eman ez zuen arren. Malkaitzen aldeko 16 – 22ko emaitzarekin amaitu zen norgehiagoka.
Aupa Donibane!
