Larunbat arratsaldean eskubaloiko giroa sumatzen zen DKEan, izan ere, Donibaneko gazteek denboraldiari amaiera eman baitzioten Loiola B-ren aurka jokatuz. Harmailetan beheko kategorietako taldeak agertu ziren, tronpeta, danbor eta karrakekin, partidu osoan animoak emanez. Partidu honetan erabakigarria izan zen Donibaneren defentsa sendoa. Loiolak lehen gola sartu zuen partiduko lehen minutuan baina, hortik aurrera, “horma berdearen” kontra joka aritu zen eta hamar minutu eman zituen batere golik sartu gabe.
Gureek, ordea, nahiko erraz aurkitzen zituzten hutsuneak San Inaziokoen ohiko defentsa irekian, lehen tarteak irekiz (6-1, 10. minutuan). Hurrengo minutuak bi taldeen arteko gol trukea izan zen, baina Loiola beti sufrituz, kostata iristen zen gure defentsa gainditzera. Lehen laurden honetan lau gol bakarrik sartu ahal izan zituzten jokoan, beste laurak zazpi metroetatik egindako jaurtiketak izan ziren. Berdeek hasieran lortutako abantailarekin iritsi ziren atsedenaldira (13-8).
Bigarren zatia berdina izan zen, gure lehen lerroa oso ongi moldatu zen, hamazazpi gol ere sartu zituzten posizio horretan ari ziren jokalariek eta Loiola, aldiz, larri, haien erasoaldietan pasibo ohartarazpenez eta etxekoen defentsa gainditu ezinean. Zale ugari, oraingo honetan, eta pozik partidu eroso batez gozatu zutenak. Txalo zaparrada ozen batekin agurtu zuten taldea, 24 – 16 emaitza ikusita.
Harro egon behar dugu talde honekin, debuta egin baitu kategorian, eta denboraldian zehar izan duten aurrerapen handia baloratu behar dugu datuekin: lehen itzulian bost puntu lortzen baziren, bigarren itzulian kopuru hori bikoiztea lortzen zen, hamabi punturaino iritsiz.
HAUR KATEGORIAN | MALKAITZ B 23 – DONIBANE 13
Larunbatean Burlatako Askatasuna pilotalekuan multzoko liderra hirugarren sailkatuaren aurka aritu zen. Bigarren fase honetan partidu guztiak irabazi dituen Malkaitz taldekoek nahiko erraz gainditu zuten Donibane. Defentsan gogor eutsi arren, agian erasoan presaka ibili ziren berdeak. Defentsa bikaina, laguntza egokiak, atezainaren geldiketa onekin, baina horrek guztiak ez zuen balio izan markagailuan puntuan ikusteko, erasoan izandako galerengatik.
Apurka-apurka urdinak euren tamaina handiagoaz aprobetxatuz eta euren eraso onari zukua atereaz, partiduaren jabe egin ziren atsedenaldira 13 – 9ko markagailuarekin iritsiz. Oraindik aukerarik zegoelako itxaropena zegoen, baina aldagelatik bueltan partiduko benetako protagonista sortu zen, Malkaitz taldeko atezaina. Donibaneren jaurtiketa ez oso onengatik edota bere erreflexu bikainengatik, kontua da bigarren zati honetan lau aldiz baino ez zutela golik markatu berdeek. Eta horrela oso zaila da partidu bat irabaztea.
Defentsan gauzak ongi egiten jarraitu zuten, baina ezinezkoa izan zen ezer gehiago lortzea, urdinak gero eta alde handiagoak irekitzen ari zirelako. Partida amaiera iritsi zen aipatu dugun 23 – 13 emaitzarekin.
BESTE EMAITZA BATZUK
- ARDOI 11 – ALEBIN MISTOA 5
- LOYOLA B 6 – BENJAMIN MISTO A 12
- EGUESIBAR C 7 – BENJAMIN MISTO B 11
